Aung San Hi Rak Thi Hlah Seh Law Tlangcung Mivialte Hlengtu Kawl Politician Tiin Minchia A Pu Kho Ko. By Saya Pahmung

Panglong agreement an ra thut ni hi Aung San nih meithal veikhat hmanh puat loin Kachin ram, Chin ram le Shane ram vialte a la kho ni ti khawh asi. Tlangcung mi kan pu le pawl nih Kawl pawl an rak zum hna lo nain, Aung San a pumpak cu an rak zumh ko (Shane pawl nih an rak zumh hlei lo). Aung San nih promise (Biakamnak) rak tuah hlah se law, Panglong agreement min an thut hnga lo, Union of Burma zong a rak chuah lai lo. Panglong minthut nak a herh mi nih, Kachin, Chin le Shane ram hna cu Kawl mi kut tang um an si lo timi a langh ter.

Nihin ni ah Tlangcung mi politician tampi nih Aung Sang a thi mi cu tlangcung mi kan van a chia, Aung San kha thi hlah selaw, bia a kan kamh mi (Self determination, Equality) Federalism cu kan ngah ko lai tiah an chim tawn (History judged him kindly).

Keimah pumpah ka hmuh nin ahcun (just my opinion) Aung San hi a ra thi caah (sualphorh) nakin a luat. Aung San hi rak thi hlah seh law 1947 Constitution kha an fehter thiamthiam ko lai. Aung San a nung ko zong ah Kawl mi nih an kan hlen thiamthiam ko hna lai timi hi ka pom ning asi. Rak thi hlah seh law, tlangcung mi vialte a hleng ve mi Kawl politician tiin min chia pu tu asi ve ko hnga (He will be just one of them). Hi kong hi a tu ka tial mi lawng si loin, Ramkhel kong bia ka chim nak ah voi tam nawn ka chim bal cang. Federal system asi lomi, Union ramkomh si loin Unitary phun asi mi, 1947 Constitution ruang ah Kawl ram chung kum 69 ral a tho i thiseng tampi a luang ter mi, Panglong Agreement le Promise he ai ral kah mi (Lam apial mi) constitution asi.

Mi tampi nih Aung San nih Panglong khua ah Tlangcung kan pu hna biakam nak a pek mi hna lio hi aa bia taktak ko (genuine asi, he was serious an ti tawn). Cu hlei ah Aung San nih a kalpi mi (tial mi)1947 Constitution caah (7) Basic Principles hna hi, Federal system cu asi ko tiin an ti tawn hna. Asi nain, kha lio caan ah, kha tin a chim lo ahcun, Kawlram cu independent ngah hlan asi caah Tlangcung mi pawl nih an pom lai lo, Panglong agreement he ai kah caah Mirang kut tang in Kawl mi he independent kan la ti lai lo, Promise nan kan pek ning si tilo, kan mah te a dang tein independent kan la te lai an ti te ko lai.

1947 Constitution cu Aung San a nung lio ah an tial thlauhmah mi asi ii, a thi hnu thla 2 ah Parliament nih a feh ter i constitution ah pom mi asi. Aung San zong nih tampi a theihpi mi Constitution draft asi. July 19 ah ra thi lo hlah selaw, September thla ah Constitution approved an tuah te tikah a mah lawng in zeihmanh a khamh kho hlei lai lo. “A ra thi lo zong ah Panglong ah biakam nak a tuah mi ning in zeihmanh a tuah kho hlei lai lo” timi hi ka zumhning cu asi. Cu ruang ah kha lio caan ah pumpak fel ruang ah zumhtlak taktak asi mi Aung San kha Kawl pawl nih an ra ngei mi hi, Kawl mi vialte caah an van a tha tuk i, Tlangcung mi pawl caah kum khua vanchiat nak asi ti khawh asi (bad fortune). Kawl pawl caah independent ngah hlan te ah Aung San hman in tlangcung mi an kan hleng khawhnak, an kan lak (uk) khawhnak a ruangpi ah acang.

Khat lei ah, Aung San nih tlangcung kan pu le pawl minthut hrimhrim ding in he tiah a rak lem hna mi le, promise a phunphun a rak pek hna mi zong hi a kan hlen duh ruang hrimhrim ah (or tlangcung mi zong Kawl kut tang a kan lak duh ruangah) kha tiangtiang persistent (min thut lo ngah lo tbtk in) a ra si nak le promise a rak pek hna nak asi ti in ruah ding a um pah.

Min a rak thu tu tlangcung kan pu le pawl nih Aung San amah pumpak in an rak zum mi hna zong hi, an palh ti khawh asi ve lo. Aung San cu dinfel tein ram le miphun ca riantuan tu asi hlei ah bia a chimh bangin a tuah pengtu arak si, bia zong piatpiat in a chim, zumh lo ding hi a rak har ngai. Cu bantuk personality a ngei ko mi nih kha tlukin promise a rak pek hna mi hmanh kha Shan Saopha pawl nih fawi le bai te in an rak zum lo. Cu ruang ah right of secession kha an rak hal ve mi asi.

Aung San nih promise a pek mi vialte kha ngah taktak ding ahcun duh ve ding kha asi ko. Hmai lei kum 50, kum 100 tiang kha an rak hmu kho ve lo i an palh ve lo. Kan mah cio zong si uh sehlaw, kan rak thut ve men ko lai.

Panglong minthut nak cu kahdaihnak (cease fire agreement) minthut zong asi lo, surrender tuahnak minthut zong asi lo, ramkomh serti nak minthut asi. Cu minthut nak cu surrender tuahnak minthut nak ah acang diam.

Be the first to comment

Leave a Reply

Your email address will not be published.


*